Yol və hava limanı tikən iri Azərbaycan şirkəti 573 milyon gəlir, 9 milyon xalis mənfəət əldə edib
"AzVirt" MMC 2022-ci ili 8 milyon 938 min manat xalis mənfəət ilə başa vurub. Şirkət 2021-ci ili 6 milyon 527 min manat xalis mənfəət ilə bağlamışdı. Beləliklə, 2021-ci illə müqayisədə 2022-ci ildə "AzVirt" MMC-nin xalis mənfəəti 2 milyon 411 min manat və ya 37% artıb.
Marja.az xəbər verir ki, "AzVirt" MMC-nin tikinti işlərindən gəlirləri 2021-ci ildə 563 milyon 201 min manat ikən, 2022-ci ildə 573 milyon 90 min manata yüksəlib (9 milyon 889 min manat və ya 1,7% artıb).
31 dekabr 2022-ci il tarixində "AzVirt" MMC 385 milyon 364 min manat cəmi kativlərə malik olub. Şirkət 2021-ci ilin sonunda 387 milyon 191 min manat cəmi aktivlərə malik idi.
"AzVirt" MMC yol və hava limanı infrastruktur layihələri üzrə tam xidmət göstərən beynəlxalq şirkətdir.
"AzVirt" MMC-də payçılar Almaniyanın "Martin Beteiligungs GmbH & Co KG" şirkəti (30%), Lüksemburqun "Falcom Holding s.a.r.l" şirkəti (25%), Elnur Əliyev (25%) və Almaniyanın "Walz GmbH & Co KG" şirkətidir (20%).
Şirkət Azərbaycan ilə bərabər Serbiya, Qırğızıstan, Ukrayna, Bosniya və Herseqovinda layihələrdə iştirak edib.
