"Kia" və "Hyundai" ABŞ-da 3.4 mln. avtomobili geri çağırıb

Kia və Hyundai ABŞ-da mühərriklərin yanması riski ilə əlaqədar 3.37 milyon avtomobili geri çağırır. Bu barədə dünən, sentyabrın 27-də ABŞ Avtomobil Yolları Hərəkətinin Təhlükəsizliyi İdarəsi (NHTSA) məlumat yayıb. Şirkətlər bu hadisələrlə bağlı heç bir qəza və ya xəsarət alan olmadığını bildiriblər.
Geri çağırılma 1.64 milyon müxtəlif "Hyundai" və "Genesis", həmçinin 2010-cu ildən 2019-cu ilədək istehsal olunmuş 1.73 milyon "Kia" avtomobilini əhatə edir. Problemi aradan qaldırmaq üçün avtomobillər geri çağırılana qədər avtomobil istehsalçıları və NHTSA avtomobil sahiblərinə binalardan uzaqda park etməyi tövsiyə edirlər.
NHTSA açıqlamasında bildirib ki, mühərrik yanğınları avtomobil idarə olunarkən və ya park edilərkən baş verə bilər. Yanğın ehtimalı əyləc mayesinin sızması ilə əlaqədardır ki, bu da qısaqapanmaya səbəb ola bilər. / banker.az