Volkswagen şirkəti hələ Kaluqadakı zavodun satışı ilə bağlı yekun qərar verməyib

Almaniyanın "Volkswagen" avtokonserni Ruisya, Kaluqadakı zavodunun satışı ilə bağlı yekun qərarını hələ qəbul etməyib, lakin bu variant hələ də nəzərdən keçirilir.
Marja xəbər verir ki, bu barədə şirkətin mətbuat xidmətindən bildirilib.
Çərşənbə günü RBC mənbələrə istinadən xəbər verir ki, "Avilon" avtomobil dileri Rusiyada Volkswagen zavodunun alınması üçün əsas iddiaçı olub, sövdələşmənin yekun təsdiqi martın 3-nə planlaşdırılıb.
"Biz vəziyyəti daim izləyirik və gələcək inkişafın müxtəlif ssenarilərini nəzərdən keçiririk. Variantlardan biri "Volkswagen Group Rus" şirkətinin aktivlərinin üçüncü tərəfə satılmasıdır. Lakin bu məsələ ilə bağlı qərar hələ qəbul edilməyib", - deyə Volkswagen-dən bildirilib.
Volkswagen 2022-ci ilin martından Rusiyada istehsalı dayandırıb. Avtomobil konserninin avtomobilləri şirkətin Kaluqadakı zavodunda (Volkswagen Tiguan, Volkswagen Polo və Skoda Rapid), eləcə də QAZ Qrupunun Nijni Novqoroddakı istehsalat sahəsində (Volkswagen Taos, Skoda Kodiaq, Skoda Octavia və Skoda Karoq) yığılırdı. / marja.az