"Twitter" hər tvit üçün simvol limitini 4 minə qədər artırıb

"Twitter Blue" istifadəçiləri daha uzun tvitlər yazmaq imkanını əldə ediblər. Belə ki, ödənişli istifadəçilər 280 simvol limiti əvəzinə 4000 simvol uzunluğunda post göndərə biləcəklər. Şirkət qeyd edir ki, uzun tvitlərlə yanaşı "Blue" istifadəçiləri tvitlərə foto və ya video kimi media faylları yerləşdirə biləcəklər.
Banker.az bu barədə "İnc.ru"ya istinadən xəbər verir.
Yalnız ödənişli istifadəçilər uzun tvitlər göndərə bilsələr də, platformadakı hər kəs onları oxuya biləcək. Yalnız ilk 280 simvolu deyil, bütün yazını oxumaq üçün "Daha çox göstər" düyməsini sıxmaq lazımdır.
Musk "Twitter"i satın alandan bəri sosial şəbəkənin gəlirlərini artırmağın yollarını axtarır. 2023-cü ilin yanvarında şirkət 2019-cu ildə siyasi reklamlara qoyulan qadağanı ləğv etməyi planlaşdırdığını açıqlayıb. Digər gəlir mənbələri arasında "Twitter" ləqəblərin satışını nəzərdən keçirir.
Yanvarın sonunda "WSJ" mənbələri Maskın "Twitter"in borcunu ödəmək üçün investorlardan 3 milyard dollara qədər vəsait toplamaq imkanını müzakirə etdiyini yazıb. Sosial şəbəkənin krediti 13 milyard dollardır.