"Səmayə"nin xalis mənfəəti 2 dəfədən çox azalıb

Gəmilər ilə yüklərin daşınması xidmətləri göstərən "Səmayə CO LTD" MMC şirkəti 2022-ci ili 252 min manat xalis mənfəət ilə başa vurub. Şirkət 2021-ci ili 620 min manat xalis mənfəət ilə bağlamışdı. Beləliklə, ötən il "Səmayə CO LTD"nin xalis mənfəəti 2,5 dəfə azalıb. Xalis mənfəətin azalması əməkhaqqı xərclərinin artması və sair əməliyyat gəlirlərinin düşməsindən qaynaqlanır. 
Marja.az xəbər verir ki, 2021-ci ildə "Səmayə CO LTD"nin əsas əməliyyat gəlirlri 8 milyon 418 min manat ikən, 2022-ci ildə 8 milyon 789 min manat təşkil edib. Şirkətin sair əməliyyat gəlirləri isə azalaraq 2021-ci ildəki 8 milyon 364 min manatdan 2022-ci ildə 6 milyon 212 min manata düşüb. 
31 dekabr 2022-ci il tarixində "Səmayə CO LTD"nin 3 milyon 125 min manat cəmi aktivlərə malik olub. Şirkət 2021-ci ilin sonunda 2 milyon 872 min manat cəmi aktivlərə malik idi. 
"Səmayə CO LTD" MMC 2003-cü ildə Bakı şəhərində təsis edilib. "Səmayə CO LTD"  yük daşıyan yük gəmiləri, neft məhsulları daşıyan tankerlər, kiçik həcmli gəmiləri alaraq 2012-ci ildən gəmiçilik şirkəti kimi formalaşmışdır. Hal-hazırda Respublikada gəmiçilik şirkəti kimi fəaliyyət göstərir.