Rolls-Royce satışları dünyada, o cümlədən Türkiyədə rekord qırıb

Lüks avtomobil markası Rolls-Royce 2022-ci ildə Türkiyədə rekord satışa imza atıb.
Banker.az Türkiyə mətbuatına istinadən xəbər verir ki, "Rolls-Royce Motor Cars İstanbul"un baş direktoru Hilal Aysal 2022-ci ildə Türkiyədə Rolls-Royce satışlarının üç rəqəmli səviyyələrə çataraq rekord qırdığını bildirib.
Türkiyədə dilerlik fəaliyyətlərinin 10-cu ilini tamamladıqlarını bildirən Aysal, İstanbulun Kuruçeşme səmtindəki salonun təmir ediləcəyini də, yenilənmiş salonu 2023-cü ilin son rübündə açmağı planlaşdırdıqlarını deyib.
Rolls-Royce Motor Cars Korporativ Kommunikasiyalar üzrə Yaxın Şərq, Avropa və Mərkəzi Asiya direktoru Frank Tiemann bildirib ki, brend 2022-ci ildə dünya miqyasında rekord satışlara çatıb. Tiemann tərəfindən verilən məlumata görə, 2022-ci ildə dünya üzrə satışlar 6 min 21 ədəd olub.
Bloombergin məlumatına görə, 2022-ci ildə Rolls-Royce-un ortalama qiyməti təxminən 534.000 dollar idi.