Dövlət Xidməti "Apple" və "iPhone"la bağlı sahibkarlara xəbərdarlıq etdi

İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə daxil olmuş müracətlərin araşdırılması zamanı bəzi sahibkarlıq subyektləri tərəfindən reklamlarda "Apple" loqosunun təsvirindən, habelə "Apple" və "iPhone" əmtəə nişanlarından qanunsuz istifadə edilməklə haqsız rəqabətə yol verilməsi əlamətləri aşkar olunub.
Bu barədə Banker.az-a Dövlət Xidmətindən bildirilir.
Qeyd edilir ki, "Apple" loqosunun təsviri, habelə "Apple" və "iPhone" sözləri beynəlxalq əmtəə nişanı kimi "Apple Inc." şirkətinin adından müvafiq qaydada qeydiyyata alınıb və Azərbaycan Respublikasının ərazisində qüvvədədir.
"Həmin əmtəə nişanları Azərbaycan Respublikasında qanunvericiliklə qorunur. Reklamlarda bu əmtəə nişanlarından yalnız əmtəə nişanının sahibinin razılığı ilə istifadə edilə bilər"- deyə, Dövlət Xidməti vurğulayır.
Dövlət Xidməti sahibkarlara reklamlarda "Apple" loqosunun təsvirindən, habelə "Apple" və "iPhone" əmtəə nişanlarından qanunsuz istifadənin dayandırılmasını tövsiyə edir.
Xatırladaq ki, "Haqsız rəqabət haqqında" Azərbaycan Respublikası Qanununa əsasən, digər bazar subyektinin əmtəə nişanından qanunsuz istifadə edilməsi haqsız rəqabət hesab olunur və buna görə qanunvericilikdə ciddi məsuliyyət tədbirləri nəzərdə tutulub.