AZAL Avropa və BƏƏ-də baş satış nümayəndəsini təyin edib
"Azərbaycan Hava Yolları" QSC (AZAL) turizm və hava yolları üzrə satış və marketinq sahəsində ixtisaslaşan "Aviareps" beynəlxalq şirkətini Avropa və Birləşmiş Ərəb Əmirliklərində (BƏƏ) baş satış nümayəndəsi təyin edib.
Bundan sonra "Aviareps" AZAL-a Avstriya, Almaniya, İspaniya, Fransa, Niderland, Böyük Britaniya və Birləşmiş Ərəb Əmirliklərində hava yolları üzrə satış və bilet xidmətləri üçün tam dəstək göstərəcək.
VTB-də minimal faiz dərəcəsi ilə nağd kredit 10.99%-dən
"Aviareps" AZAL-ın baş satış nümayəndəsi olaraq şirkətin əsas bazarlarda iştirakını gücləndirməyə kömək edəcək.
AZAL-ın Satış və Tərəfdaşlıq üzrə direktoru Çingiz Mürsəlov bunu şirkətin beynəlxalq aviadaşımalar bazarda mövqelərini inkişaf etdirmək və möhkəmləndirmək üçün atdığı mühüm addım kimi dəyərləndirib: "Bu əməkdaşlıq bizə rəqabətli bazarlarda mövqeyimizi gücləndirməyə yardımçı olacaq".
Qeyd edək ki, Azərbaycanın milli aviadaşıyıcısı Avropa, Asiya və Şimali Amerika da daxil olmaqla 72 istiqamətə uçuşlar həyata keçirir.
Hazırda AZAL bir "Boeing 787-8 Dreamliner" də daxil olmaqla 26 "Airbus" və "Boeing" təyyarələrinə sahibdir.
"Aviareps" 1994-cü ildə Almaniyada yaradılıb və müştərilərinə qlobal bazarlara çıxmağa kömək edir. Şirkətin dünyanın 61 ölkəsində 67 ofisi var.
© "Report"
