"Apple" M2 Pro və M2 Max çipləri əsasında yeni MacBook-lar təqdim edib – Qiymətlər
"Apple" yeni M2 Pro və M2 Max prosessorları əsasında yeni MacBook təqdim edib. Noutbuk bir yükləmə ilə 22 saata qədər işləyir, 8K və 4K displeyləri dəstəkləyən HDMI konnektoru ilə təchiz edilib.
Banker.az bu barədə "Vc.ru"ya istinadən xəbər verir.
Məlumata görə, M2 Pro ilə təchiz olunmuş model 10 və ya 12 nüvəli, M2 Max ilə təchiz olunmuş model isə 12 nüvəli prosessor alıb. Hər iki noutbuku öncədən sifariş etmək mümkündür. Satışlar yanvarın 24-də başlayacaq.
14 düymlük MacBook Pro-nun qiyməti 1999 dollardan, 16 düymlük MacBoook Pro-nun qiyməti isə 2499 dollardan başlayır.
M2 Pro prosessorlu versiya 200 GB/s qədər ötürmə qabiliyyəti ilə 16 və ya 32 GB RAM, M2 Max prosessorlu versiya isə 400 GB/s ötürmə qabiliyyəti ilə 32, 64 və ya 96 GB RAM təqdim edəcək. Modellərin SSD tutumu 512 GB ilə 8 TB arasında dəyişir. Onu da qeyd etmək vacibdir ki, bütün konfiqurasiyalarda süni intellektlə işləmək üçün nəzərdə tutulmuş 16 nüvəli neyroprosessor var.
