"ADY Konteyner" biznes müştərilərə alternativ marşrut təqdim edir
"ADY Konteyner" Bakı-Tbilisi-Qars dəmir yolu xəttinin Gürcüstan hissəsində aparılan təmir bərpa işləri yekunlaşanadək biznes müştərilərə alternativ marşrut təqdim edir.
Azərbaycan Dəmir Yollarının yaydığı məlumatda bildirilir ki, bu yeni dəmiryolu-dəniz əlaqəsi yüklərin təyinat stansiyalarına vaxtında çatdırılmasını və təchizat zəncirinin bütövlüyünü təmin edəcək.
Yeni marşrut ilə yüklər gəmilərlə Türkiyənin Dərincə, Mersin, Alsancaq, Marport və Evyap limanlarından Gürcüstanın Poti və Batumi limanlarına çatdırılacaq.
Limanlarda konteynerlər platformalara aşırılaraq dəmir yolu vasitəsilə Bakı limanına daşınacaq. Daha sonra yük Qazaxıstanın Aktau və Türkmənistanın Türkmənbaşı limanlarına, oradan da dəmir yolu vasitəsilə Orta Asiyadakı təyinat stansiyalarına göndəriləcək. / marja.az
