Yeni qərardan sonra xaricdən gətirilən avtomobillər – NƏ QƏDƏR BAHALAŞACAQ – HESABLAMA  

Qeyd: Bu hesablama FED.az-a məxsusdur, istənilən hissəsindən istifadə edilərkən istinad edilməlidir. 
Xəbər verildiyi kimi, bu gün, martın 29-da Nazirlər Kabineti "İstismar olunan minik avtomobillərinin Azərbaycan Respublikasının gömrük ərazisinə gətirilməsinin məhdudlaşdırılması haqqında" qərar qəbul edib. 
FED.az xəbər verir ki, yeni qərara əsasən zavod buraxılış tarixinə görə yaşı 10 ildən çox olan minik avtomobillərinin (raritet minik avtomobilləri və gömrük ərazisinə müvəqqəti gətirilən minik avtomobilləri istisna olmaqla) Azərbaycan Respublikası ərazisinə gətirilməsi məhdudlaşdırılıb. Bu Qərar dərc edildiyi gündən 30 gün sonra qüvvəyə minəcək. 
Yeni qərar nəticəsində ölkəyə indiyədək gətirilməsi mümkün olan köhnə avtomobillər gətirilə bilməyəcək. Belə ki, indiyədək Azərbaycana 2006-cı ilin yanvarın 1-dən sonra istehsla olunan avtomobillər gətirilə bilərdisə, bundan sonra yalnız 2013-cü ildən  sonra buraxılan maşınlar gətiriləcək. 
Bu isə avtomobillərin qiymətinin artmasına səbəb olacaq. 
Bununla bağlı araşırma aparmaq üçün FED.az ölkədə ən populyar olan iki modelin 2006 və 2013-cü illər üzrə qiymət müqayisəsini aparıb. 
Belə ki, "Mersedes Bens" E220 modelinin 2006-cı il modelləri Almaniyada 6000-11500 avro arasında dəyişir. 
Həmin avtomobilin 2013-cü il buraxılışlı modelinin qiyməti isə Almaniyada 12700-28500 avro arasında dəyişir. 
Başqa sözlə, yeni qərardan sonra ölkəyə gətirilməsinə icazə verilən bu modelin qiyməti 7-17 min avro bahalaşacaq. Bu da minimum 13 min manat artım deməkdir – minimum qiymətlərlə. 
Azərbaycanda populyar olan digər alman avtomobili – "BMV 320" modellərində də qiymətlər yeni qərardan sonra kəskin artacaq.
Belə ki, hazırda Almaniyada 2006-2007-ci il buraxılış BMV 320 modelinin qiyməti 3500 avrodan 15-16 min avroyadək dəyişir. Eyni modelin 2013-cü il istehsalı üçün olan qiymətləri isə 8 min avrodan başlayır və 25-26 min avroyadək dəyişir. 
Başqa sözlə bu modelin qiymətində də minimum 5 min avro artım gözlənilir – bu da 9-10 min manat demiəkdir. 
Amma yeni qərardan sonra maşın alıcılarının xərcinin artması təkcə maşınların Almaniyadakı qiymətinin artmasından ibarət deyil. Qanuna görə, ölkəyə gətirilən avtomobillərə vergi və rüsumlar da həmin qiymətlər əsasında hesablanır. 
Nəticədə yeni qərardan sonra ölkəyə gətirilən modellərdə avtomobillərə daha yüksək məbləğdə rüsumlar hesablanacaq.