"WhatsApp" mesencerin bu funksiyasından imtina etdi – FOTO

"WhatsApp" mesencerinin tərtibatçıları "Electron" çərçivə bazasında hazırlanan masaüstü kompüter müştərisini dəstəkləməyi rəsmən dayandırıb.
Artıq köhnə "WhatsApp" tətbiqini "Windows" və ya "macOS"da açarkən istifadəçilərə bu versiyanı silmək və yenisini yükləmək tövsiyə edilir.
Qeyd edək ki, "Electron" bazasında "WhatsApp" 2016-cı ildə yaradılıb. Əslində, bu, "WhatsApp"ın veb-versiyasının ayrı bir proqram şəklində tətbiqidir. 2022-ci ildə şirkət zəif performans və yavaş interfeys animasiyaları da daxil olmaqla "Electron"un bütün çatışmazlıqlarını aradan qaldıran sıfırdan hazırlanmış bir proqram buraxdı. Hazırda şirkət onu inkişaf etdirmək istəyir.
Bununla belə, bəzi istifadəçilər "WhatsApp Electron"a dəstəyin dayandırılmasından narazı qalıblar. Belə ki, tətbiqin müasir versiyası istifadəçilərə köhnə mesencerdə mövcud olan biznes funksiyalarını təqdim etmir. Çatışmayan xüsusiyyətlərə biznes-akkauntun sürətli cavabları, mağaza kataloqunun idarə edilməsi və s. daxildir.
Kompüterdə "WhatsApp"a girişi itirmiş istifadəçilər müasir mesenceri "Microsoft Store" və ya "WhatsApp"ın saytından yükləyə bilərlər.
Bundan əvvəl "WhatsApp"ın çatlarda mesajları sancaqlamaq funksiyası barədə xəbər vermişdik.
/ banker.az