"WhatsApp" mesajları başqa telefona köçürməyi asanlaşdırıb

"WhatsApp" QR-kodlardan istifadə etməklə mesajları bir cihazdan digərinə ötürməyə imkan verən yeni funksiya təqdim edib. Bu funksiya bulud yaddaşında ehtiyat nüsxələrin yaradılması ehtiyacını aradan qaldırır, Banker.az bu barədə Kommersant-a istinadən xəbər verir.
"WhatsApp" mesajları bir cihazdan digərinə köçürmək çox mürəkkəb olduğuna görə dəfələrlə tənqid olunub. Yeni funksiya ilə istifadəçi "Söhbətlər" bölməsinə daxil olub "Söhbətlərin ötürülməsi"ni seçəcək, sonra isə yeni cihazda QR-kodu skan edəcək.
Funksiya yalnız eyni əməliyyat sistemi üzərində işləyən və eyni Wi-Fi şəbəkəsinə qoşulan cihazlar arasında işləyəcək. Messencer bu funksiyanı 2023-cü ilin yanvar ayından sınaqdan keçirir. Bundan əvvəl "WhatsApp" eyni hesabın birdən çox telefonda istifadəsinə icazə verən yeniləmə təqdim edib.