"Ultra Technologies" şirkətinin mənfəəti 2 dəfəyədək azalıb

Ultra Technologies MMC 2021-ci ili 2 milyon 401 min manat xalis mənfəətlə başa vurub. Əvvəlki ildə şirkətin mənfəəti 4 milyon 191 min manat olub ki, bu da illik müqayisədə 1.7 dəfə azalma deməkdir.
Banker.az bu barədə MMC-nin maliyyə hesabatına istinadən xəbər verir.
2021-ci ildə "Ultra Technologies" MMC-nin satışdan gəliri 17 milyon 976 min manat (əvvəlki ilə nisbətən 31% az), satışın maya dəyəri 12 milyon 863 min manat (34% az), inzibati xərcləri 1 milyon 681 min manat (15% az) təşkil edib.
Hesabat dövründə şirkətin cəmi aktivləri 10 milyon 441 min manat olub ki, bu da illik müqayisədə 11% artımdır. "Ultra Technologies" MMC-nin cəmi öhdəlikləri 3 milyon 206 min manatdan 5 milyon 406 min manata çatıb, cəmi kapitalı isə 6 milyon 205 min manatdan 5 milyon 34 min manata çatıb.
Xatırladaq ki, "Ultra Technologies" 1999-cu ildə təsis edilib. Hal-hazırda "HP", "Oracle", "Cisco", "IBM", "Kingston", "Tunçmatik", "Rittal", "AHA", "MiSys" və bir sıra digər məşhur İT korporasiyalarının rəsmi statuslu tərəfdaşıdır.