Tesla Meksikada da elektrik avtomobil zavodu tikəcək
Amerikanın elektrik avtomobil istehsalçısı Tesla gələn həftə Meksikada elektrik avtomobil zavodunun tikintisini elan edə bilər.
Marja xəbər verir ki, bu barədə Bloomberg xəbər yayıb.
"Tesla Inc. Meksikanın şimal-şərqindəki sənaye zonasında elektrik avtomobillərinin yığılması zavodu tikmək planlarını yekunlaşdırır və zavodun tikintisini gələn həftə ərzində (bu həftə -red) elan edə bilər", - agentliyin məlumatında deyilir.
Məlumata görə, zavod Meksikanın Nuevo Leon əyalətinin Monterrey şəhərində tikiləcək.
Agentliyin məlumatına görə, Meksikadakı zavod Berlin, Şanxay və ABŞ-ın Texas ştatında yeni zavodların daxil olduğu şirkətin qlobal istehsalın genişləndirilməsi proqramının bir hissəsi olacaq.
Amerika şirkəti Tesla Motors 2003-cü ildə elektrik nəqliyyat vasitələri və onlarla əlaqəli texnologiyaların istehsalçısı kimi təsis edilmişdir. Qərargah Kaliforniyanın Palo Alto şəhərində yerləşir. Elektrikli nəqliyyat vasitələri ilə yanaşı, şirkət öz texnologiyasından istifadə edərək akkumulyatorlar və elektrik mühərrikləri istehsal edir və onu Toyota və Daimler kimi digər avtomobil şirkətlərinə satır. / marja.az
