"Şahdağ Turizm Mərkəzi" növbəti dəfə böyük zərər edib - 2 İLDƏ 23 MİLYON MANAT ZƏRƏR
Dövlət Turizm Agentliyinə məxsus "Şahdağ Turizm Mərkəzi" QSC növbəti ili zərrələ başa vurub.
FED.az şirkətin hesabat dövrünün bitməsindən 15 ay sonra açıqladığı hesabatına əsasən xəbər verir ki, şirkət 2021-ci ildə 6 milyon 344 min manat zərər edib.
2021-ci ildə "Şahdağ Turizm Mərkəzi"nin qeyri-birja əməliyyatları kimi göstərilən satışlardan gəlirləri 6 milyon 147 milyon manat, dövlət büdcəsindən alınan gəlirləri isə 13 milyon 980 min manat olub.
2020-ci illə müqayisədə şirkətin satışdan gəlirləri təqribən 200 min manat, dövlət büdcəsindən ayırmaları isə 1,3 milyon manat artıq olub.
Bundan başqa "Şahdağ Turizm Mərkəzi" QSC 2021-də 1,3 milyon manata yaxın sair gəlirlər də əldə edib.
Satış maya dəyəri isə 10,3 milyon manat olub – təqribən 2020-də olduğu kimi.
Nəticədə şirkətin satış gəliri 11,1 milyon manat təşkil edib. 2020-ci ildə bu rəqəm 8,35 milyon manat idi.
2021-ci ildə "Şahdağ Turizm Mərkəzi" QSC inzibati xərclərini kəskin azaldıb – əvvəlki ildəki 25 milyon manatdan 14,6 milyon manata endirib.
Belə kəskin azalma daha çox amortizasiya xərclərinin azalması hesabına baş verib – 19 milyon manatdan 12 milyon manata enib.
Bundan başqa, "Şahdağ Turizm Mərkəzi" QSC 2021-ci ildə sığorta və texniki dəstək xərclərini ixtisar edib. 2020-ci ildə sığortaya 1,4 milyon manat, texniki dəstək xərclərinə isə 2,6 milyon manat xərclənmişdi. 2021-də bu xərclər olmayıb.
"Şahdağ Turizm Mərkəzi" QSC nəqliyyat xərclərini də 5 dəfə azaldaraq 460 min manatdan 91 min manata endirib.
Əvəzində məsləhət xidmətinə çəkilən xərclər 50% artaraq 1,4 milyondan 2 milyona yüksəlib.
Nəticədə şirkət 2021-ci ili 6 milyon 344 min manat zərərlə tamamlayıb. 2020-ci ildə zərər daha çox idi – 16 milyon 855 min manat.
Ümumilikdə "Şahdağ Turizm Mərkəzi" QSC-nin indiyəhdək yığılmış zərəri 88,5 milyon manatdır.
2022-ci il yanvarın 1-nə "Şahdağ Turizm Mərkəzi"nin aktivləri 2,2% azalaraq 312 milyon manata enib. Şirkətin öhdəlikləri isə 19% azalaraq 3 milyon manata düşüb. Kapitalı isə 2% azalaraq 309 milyon manat olub.
