Qarabağda dəmir yollarının tikintisi işlərinin icra vəziyyətləri açıqlanıb
Yol infrastrukturunun müasirlədirilməsi istiqamətində 363 km uzunluğunda Sumqayıt-Yalama dəmiryol xəttinin yenidən qurulması qrafikə uyğun davam etdirilmiş və tikinti işlərinin 48%-i icra olunmuşdur. Layihənin tamamlanması gələcəkdə bu istiqamətdə daha çox yükün sürətlə və təhlükəsiz daşınmasına geniş imkanlar yaradacaqdır.
Marja.az xəbər verir ki, bu, "Azərbaycan Dəmir Yolları"" QSC 2022-ci il üzrə fəaliyyətinin yekunlarına dair məlumatında bildirilir.
Həmçinin məlumatda deyilir ki, işğaldan azad olunmuş ərazilərdə quruculuq işləri çərçivəsində dəmir yollarının və infrastrukturunun tikintisi işləri də qrafik üzrə davam etdirilmişdir.
2024-cü ildə yekunlaşdırılması planlaşdırılan açılmış uzunluğu 140,6 km olan Horadiz-Ağbənd dəmir yolu xəttinin layihələndirilməsi işləri 78% yerinə yetirilmiş, tikinti işlərinin isə 38%-i (53,2 km) icra edilmişdir. Beynəlxalq əhəmiyyətli marşrut olmaqla Horadiz-Ağbənd dəmir yolu yaxın gələcəkdə Asiya ilə Avropa arasında yüklərin sürətlə daşınmasında böyük rol oynayacaq.
Horadiz-Ağbənd dəmir yolu xəttinin Həkəri çayı üzərindən keçən hissəsində 13 aşırımlı və uzunluğu 418 metr olan dəmiryol körpüsünün tikintisi üzrə işlərin 85%-i tamamlanmışdır. Azərbaycanın ən uzun dəmir yolu körpüsü region ölkələri arasında yükdaşımaların artırılmasına təkan verəcəkdir.
Bərdə-Ağdam dəmir yolunun bərpası istiqamətində də mühüm irəliləyişlər əldə olunmuş və tikinti üzrə işlərin 64%-i yerinə yetirilmişdir.
