Lada avtomobillərini satan Azərbaycan şirkətinin gəlirləri 2 dəfədən çox azalıb

Rusiyanın "Avtovaz" SC-nin Azərbaycandakı Baş idxalçısı və rəsmi distribyutoru "Xəzər Lada" ASC 2022-ci ili 440 min manat xalis mənfəət ilə başa vurub. Şirkət 2021-ci ili 503 min 506 manat xalis mənfəət ilə bağlamışdı. Beləliklə, "Xəzər Lada" ASC-nin xalis mənfəəti 2022-ci ildə 2021-ci illə müqayisədə 63 min 506 manat və ya 14,4% azalıb.
Marja.az xəbər verir ki, "Xəzər Lada" ASC-nin cəmi əməliyyat gəlirləri 2021-ci ildə 27 milyon 946 min manat ikən, 2022-ci ildə 11 milyon 774 min manat təşkil edib.(16 milyon 172 min manat və ya 137% azalıb). Şirkətin xərcləri isə 2021-ci ildəki 27 milyon 172 min manatdan 11 milyon 223 min manata geriləyib. 
Şirkətin satışdan gəlirləri 25 milyon 969 min manatdan 11 milyon 774 min manata enib.
Qeyd edək ki, Rusiyanın Ukraynaya hücumundan sonra sanksiyalar, iqtisadi əlaqələrin pozulması, ehtiyyat hissələrinin alınmasında problemlər səbəblərindən "Avtovaz" SC ötən il istehsalını dayandırmış, satışı kəskin azalmışdı. Şirkət ötən ilin sonlarından başlayaraq istehsalını bərpa edir. "Avtovaz"  2023-cü ildə 400 000-dən çox avtomobil istehsal etməyi planlaşdırır. Fevralda Sankt-Peterburqdakı keçmiş Nissan zavodu "AvtoVAZ"ın mülkiyyətinə keçib. Sankt-Peterburqdakı zavodda ilkin olaraq iki krossover və bir sedan modelin istehsalı nəzərdə tutulur.
Eyni zamanda Mayın 1-dən "AvtoVAZ" "Lada" avtomobillərinin qiymətini orta hesabla 2% artırıb.