Daha 5 marşrut müsabiqəyə çıxarıldı
Bakı Nəqliyyat Agentliyi 15, 147, 185, 186 və 213 nömrəli müntəzəm marşrut xətləri ilə bağlı müsabiqə elan edib.
Marja xəbər verir ki, bu barədə Agentliyin yaydığı məlumatda bildirilir.
"Müntəzəm sərnişin daşımalarında əhalinin tələbatının ödənilməsi, sərnişinlərə keyfiyyətli xidmət göstərilməsinin təmin edilməsi, sağlam rəqabət mühitinin formalaşdırılması və bu sahədə dövlət tənzimlənməsinin təkmilləşdirilməsi məqsədilə tədbirlər davam etdirilir. Bu çərçivədə 5 müntəzəm marşrut xətti ilə bağlı müsabiqə elan olunur. Daxil olan vətəndaş müraciətləri əsasında 15, 147, 185, 186 və 213 nömrəli müntəzəm marşrut xətləri üzrə təhlillər aparılıb. Sərnişindaşımaların vəziyyəti qənaətbəxş hesab edilmədiyindən müsabiqəyə çıxarılıb", - məlumatda deyilir.
Qeyd edilib ki, müsabiqə Azərbaycan Respublikası Nazirlər Kabinetinin 2009-cu il 3 aprel tarixli 52 nömrəli qərarı ilə təsdiq edilmiş "Avtomobil nəqliyyatı ilə müntəzəm şəhərdaxili (rayondaxili), şəhərlərarası (rayonlararası) və beynəlxalq marşrutlar üzrə sərnişin daşımalarına daşıyıcıların cəlb olunmasına dair müsabiqənin keçirilməsi qaydasına" uyğun keçiriləcəkdir.
Müsabiqədə iştirak etmək istəyənlər Bakı Nəqliyyat Agentliyinə müraciət edə bilər.
Həmçinin Sentyabr ayından bu yana 103, 130, 139, 149 , 206, 36, 123, 134, 183, 193, 37, 55, 93, 101, 113, 70, 79, 91, 145 və 160A nömrəli müntəzəm marşrut xəttlləri ilə bağlı müsabiqələr elan olunmuşdur. / marja.az
