"Buta Airways"in saytından bilet almaq qeyri-mümkündür
Xəbər verdiyimiz kimi, "Azərbaycan Hava Yolları" QSC 2023-cü ilin yay cədvəli çərçivəsində (martın 26-dan oktyabrın 29-dək) 9 istiqamət üzrə 29 avroya aviabiletlərin satışını elan edib.
AZAL QSC-nin tərkib hissəsi olan aşağıbüdcəli "Buta Airways" aviaşirkəti bu gün saat 16:00-dan bütün hava limanı rüsumları daxil olmaqla, minimal "Büdcə" tarifi ilə 29 avroya 10 000 biletin onlayn satışına başlayıb.
Marja.az xəbər verir ki, hazırda butaairways.az saytının ağır çalışdığı müşahidə edilir. Gediləcək hava limanı və tarixlər seçildikdən sonra növbəti mərhələyə - sərnişinlər barədə məlumatların daxil edilməsi mərhələsinə keçmək mümkün olmur.
Xeyli müddət "Gözləyin" yazıldıqdan sonra, ekranda "Xahiş edirik, gediş və dönüş uçuşunu seçin. Cəmi qiymət seçiminizə əsasən hesablanacaqdır. Qeyd edək ki, seçiminizi dəyişsəniz, qiymət yenidən hesablana bilər. Qiymət bir sərnişin üçündür və vergilər daxildir" yazılar, lakin "Gediş" və "Dönüş" barədə məlumatlar göstərilmir.
