Bu ölkəyə gedən turistlər - VERGİ ÖDƏYƏCƏK
Tailand hökuməti çərşənbə axşamı ölkəyə daxil olan xarici turistlərdən torpaqbasdı vergisi tutulması barədə qərarı təsdiqləyib.
FED.az xəbər verir ki, ölkəyə quru sərhədləri ilə gələnlər 150 bat (4.48 dollar ), hava yolu ilə gələnlər isə 300 bata (8.83 dollar) qədər vəsait ödəyəcəklər.
Yeni qanunun təsdiqi bu ilin iyun ayının 1-dən qüvvəyə minəcək.
Tailanda diplomatik pasport və iş icazələri ilə daxil olanlar bu vergidən azaddırlar. Habelə ölkədə bir gündən az vaxt keçirən iki yaşından kiçik uşaqlar və tranzit sərnişinlər də ödənişdən azaddırlar.
Ölkənin Turizm və İdman Naziri hökumətin iclasından sonra jurnalistlərə açıqlamasında bildirib ki, nəzərdə tutulan rüsum Tailandda daxili turizmin və sığortanın inkişafına yönəldiləcək. (Azərtac)
