Bakı-Qazax yolunun bu hissəsində tikinti işləri yekunlaşıb
Azərbaycan Avtomobil Yolları Dövlət Agentliyi Böyük İpək yolunun tərkib hissəsi olan Bakı-Ələt-Qazax-Gürcüstanla dövlət sərhədi avtomobil yolunun 130 kilometrlik Gəncə-Qazax-Gürcüstan sərhədi hissəsinin 82,2-ci kilometrlik Gəncə-Zəyəm-Qırılı hissəsində tikinti işlərini yekunlaşdırıb.
"Marja" xəbər verir ki, bu barədə Agentlik məlumat yayıb.
İllik 12.99%-dən 40 000 AZN-dək zaminsiz komissiyasız kredit!
Məlumata görə, layihəyə əsasən torpaq yatağının ümumi eni 27,5 metrdir. Magistralın Gəncə-Qazax-Gürcüstan sərhədi hissəsində tikinti işləri 3 hissə üzrə icra olunur. Belə ki, 39,8 kilometrlik 1-ci və 42,4 kilometrlik 2-ci hissələrin 1-ci texniki dərəcəyə uyğun inşası artıq yekunlaşıb.
Magistralın tikintisi yekunlaşmış Gəncə-Zəyəm-Qırılı hissəsində, 16 avtomobil körpüsü və yolötürücüsü, 13 yol qovşağı, 53 alt keçid, 362 dairəvi boru, 22 düzbucaqlı su keçidi, 56 dayanacaq inşa edilib.
Eyni zamanda 47,95 kilometrlik 3-cü, Qırılı-Gürcüstan sərhədi hissəsində qaya dolğusu və dənəvər tərkibli əsasın tikintisi, suötürücü boruların, alt keçidlərin, körpülərin inşası, əsasın tikintisi, asfalt-beton örtüyünün döşənməsi işləri icra olunur. Sözügedən hissədə hazırda 5 avtomobil körpüsü və yolötürücüsü, 8 yol qovşağı inşa edilir. Layihə üzrə yolboyu 25 yol qovşağı və ötürücüsü, 17 avtomobil körpüsü, 83 yeraltı keçid, 38 düzbucaqlı su keçidi, 547 dairəvi suötürücü boru, zəruri yerlərdə 84 avtobus dayanacağı olacaq.
/ marja.az
