2022-ci ildə BMW avtomobillərinin satışı 5,1 faiz azalıb
2022-ci ildə 2,1 milyon ədəd BMW avtomobili satılıb ki, bu da 2021-ci illə müqayisədə 5,1% azdır. Lakin şirkət qlobal premium avtomobil seqmentində liderliyini qoruyub saxlayır.
Marja.az xəbər verir ki, 2022-ci il üçün BMW qrupunun (BMW, MİNİ, Rolls-Royce ) satışları 4,8% azalaraq 2,4 milyon ədədə düşüb. Qrup tam elektriklə işləyən avtomobillərin satışını iki dəfədən çox artıraraq 215 755 ədədə çatdıra bilib.
BMW AG-nin Müştərilər, Brendlər və Satışlar üzrə İdarə Heyətinin Üzvü Peter Nota deyib: "Biz 2023-cü ildə bu uğurun üzərində dayana biləcəyimizə əminik, çünki biz tam elektrikli modellərimiz üçün son dərəcə yüksək sifariş həcmi görməyə davam edirik".
2023-cü ildə BMW qrupunun ümumi satışlarının 15%-nin tam elektriklə işləyən avtomobillər təşkil etməsi hədəflənir.
2022-ci ildə Qrup 2.100.692 ədəd BMW, 292.923 ədəd MINI və 6.021 Rolls-Royce avtomobili satıb.
Qeyd edək ki, 2021-ci ildə BMW Group 2 521 525 ədəd avtomobil sataraq satış rekordu qırmışdı.
